Klíníkin Ármúla kaupir Meltingarklíníkina

Klíníkin Ármúla hefur gengið frá kaupum á Meltingarklíníkinni, sérhæfðri heilbrigðisstarfsemi á sviði meltingarlækninga sem stofnuð var árið 2021. Með kaupunum bætist sérhæfð meltingarþjónusta við starfsemi Klíníkurinnar Ármúla.

Frá stofnun hefur Meltingarklíníkin byggt upp öfluga starfsemi á sviði meltingarlækninga með áherslu á greiningu og meðferð sjúkdóma í meltingarfærum, ristli og endaþarmi. Með kaupunum skapast aukin tækifæri til að efla þjónustuna, stytta biðtíma og bæta aðgengi sjúklinga að sérhæfðri greiningu og meðferð. Nýverið flutti Meltingarklíníkin í stærra og endurnýjað húsnæði með sérútbúinni aðstöðu og nútímalegum tækjabúnaði sem styður við áframhaldandi uppbyggingu starfseminnar.

„Meltingarklíníkin hefur á skömmum tíma byggt upp sterka starfsemi með reynslumiklu og faglegu teymi. Með þessum kaupum styrkjum við þjónustuframboð okkar enn frekar og skapast aukin tækifæri til að bæta aðgengi sjúklinga að sérhæfðri greiningu og meðferð. Við hlökkum til að byggja áfram á því góða samstarfi sem þegar hefur verið og halda áfram uppbyggingu starfseminnar,“ segir Kristján Jón Jónatansson, framkvæmdastjóri Klíníkurinnar Ármúla.

Kaupin eru liður í áframhaldandi uppbyggingu Klíníkurinnar Ármúla á sviði sérhæfðrar heilbrigðisþjónustu, með áherslu á að efla þjónustu og bæta aðgengi sjúklinga.