Þetta meðhöndlum við
Slitgigt í mjöðm eða hné veldur verkjum, stirðleika og skertri hreyfigetu sem hefur áhrif á svefn, vinnu og daglegt líf. Þegar önnur meðferð – þjálfun, þyngdarstjórnun, verkjalyf og sprautumeðferð – dugar ekki lengur getur liðskiptaaðgerð gefið þér lífsgæðin aftur.
Á Klíníkinni gerum við liðskipti á mjöðmum og hnjám með reyndu teymi bæklunarskurðlækna, svæfingalækna, hjúkrunarfræðinga og sjúkraþjálfara. Aðgerðirnar eru gerðar á skurðstofum okkar og þú dvelur á legudeildinni í einbýli þar til þú ert tilbúin/n heim – oftast eftir einn til tvo daga.
Við bjóðum einnig liðspeglanir á hnjám og APS-meðferð við einkennum slitgigtar. Aðgerð með greiðsluþátttöku Sjúkratrygginga Íslands krefst tilvísunar; þú getur einnig valið að greiða sjálf/ur – sjá kaflann um biðtíma hér að neðan.
Slitgigt
Slitgigt er vegna ójafnvægis í niðurbroti og endurbyggingu liðbrjósks, þannig verður liðbrjóskið þynnra og liðurinn fer að mynda beinnabba við liðbrúnir sem skerðir hreyfigetu liðsins. Þegar liðskemmdirnar eru orðnar miklar er oft allt liðbrjósk horfið sem veldur því að beinið er bert, á sama tíma breytist magn og gæði liðvökvans þannig að liðurinn bólgnar upp við álag. Þetta er ástæða þriggja helstu einkenna slitgigtar:
Verkir við álag
Skert hreyfigeta
Stirðleiki
Ástæða þess að sum okkar þróa með sér slitgigt er að mestu óþekkt. Það er þó ljóst að ástæðan er fjölþætt og sjaldan er eingöngu ein ástæða þar að baki. Nokkrir áhættuþættir eru vel þekktir:
Kyn (konur eru í meiri áhættu að þjást af slitgigt en menn)
Aldur (liðbrjóskið eins og aðrir vefir líkamans verða fyrir öldrun og tapa gæðum)
Þyngd (offituvandamál eykur líkur á slitgigt, sérstaklega í hnjám)
Fyrri áverkar (brot eða alvarlegir liðbandaáverkar)
Slitgigt er mjög algeng, þannig er greinanleg slitgigt á röntgenmynd hjá um 5% af einstaklingum á aldrinum 35-54 ára. Slitgigt fer vaxandi með aldri, hlutfall þeirra sem eldri eru en 65 ára og þjást af slitgigt er hátt. Þó er það ekki þannig að allir sem hafa slitbreytingar hafi einkenni af sjúkdómnum.
Svona getum við hjálpað þér
Leiðandi sérfræðingar á sínu sviði
Teymið
Sérfræðingar í fremstu röð og framúrskarandi þjónusta.
Verðskrá
Aðgerðir Bæklunarklíníkurinnar eru flestar framkvæmdar skv. samningi Læknafélags Reykjavíkur við Sjúkratrygginga Íslands en upplýsingar um greiðsluþátttöku sjúklinga er að finna á vef Sjúkratrygginga Íslands: sjukra.is
Aftur á móti er samningur um liðskiptaaðgerðir á milli Klíníkurinnar og Sjúkratrygginga Íslands. Þar er magn aðgerða takmarkað þannig að Klíníkin býður einnig upp á aðgerðir án greiðsluþátttöku Sjúkratrygginga.
Aðgerð
Verð frá
Liðskipti hné án greiðsluþáttöku SÍ
1.525.000
Liðskipti mjöðm án greiðsluþáttöku SÍ
1.525.000
APS meðferð
129.000
Auka legunótt
94.000
Liðskipti mjöðm, ef á samningi við SÍ
Full greiðsluþátttaka SÍ
Liðskipti hné, ef á samningi við SÍ
Full greiðsluþátttaka SÍ
Innritunarviðtal v/liðskipta án greiðsluþáttöku SÍ
27.000
Hvað þarf ég að bíða lengi?
Bið eftir liðskiptaaðgerð fer eftir því hvar þú ert á biðlista og hvort aðgerðin er greidd af Sjúkratryggingum Íslands (SÍ) eða þér sjálfum. Embætti landlæknis heldur utan um biðlista allra stofnana og birtir tölurnar í mælaborðinu hér að neðan. Það er uppfært mánaðarlega og sýnir bæði fjölda þeirra sem bíða eftir liðskiptaaðgerð á mjöðm eða hné og hve lengi þeir hafa beðið – á Klíníkinni og annars staðar á landinu. Viðmið embættisins er að enginn þurfi að bíða lengur en 90 daga eftir aðgerð.
Heimild: Embætti landlæknis – mælaborð liðskiptaaðgerða. Tölurnar eru uppfærðar mánaðarlega af embættinu og ná til allra stofnana á Íslandi. Opna mælaborðið í fullri stærð.
Aðgerð með greiðsluþátttöku SÍ
Klíníkin er með samning við Sjúkratryggingar Íslands um liðskiptaaðgerðir á mjöðm og hné. Sé skilyrðum SÍ fullnægt greiða Sjúkratryggingar aðgerðina og þú greiðir einungis komugjald samkvæmt reglugerð um greiðsluþátttöku sjúkratryggðra. Skilyrðin eru í stuttu máli þau að bæklunarlæknir hafi metið að liðskiptaaðgerð sé rétta meðferðin og þú sért á biðlista eftir aðgerð, að þú sért sjúkratryggð/ur á Íslandi og að fjöldi aðgerða á samningi ársins sé ekki uppurinn – þeir sem hafa beðið lengst ganga fyrir.
Við förum yfir stöðu þína í fyrsta viðtali og segjum þér strax hvort og hvenær þú átt rétt á greiðsluþátttöku SÍ. Þú þarft ekki að reikna þetta út sjálf/ur.
Vilt þú ekki bíða?
Hafir þú ekki öðlast rétt til greiðsluþátttöku Sjúkratrygginga getur þú valið að greiða aðgerðina sjálf/ur og fá hana gerða fyrr. Sama teymi, sama skurðstofa og sama legudeild; eini munurinn er hver greiðir. Verðið er í verðskránni hér að ofan.
Athugaðu að samkvæmt samningi Klíníkurinnar við Sjúkratryggingar Íslands er okkur ekki heimilt að gera aðgerð gegn sjálfsgreiðslu á þeim sem þegar eiga rétt á greiðsluþátttöku SÍ. Við förum yfir rétt þinn með þér áður en ákvörðun er tekin.
