Öxlin er hreyfanlegasti liður líkamans og því viðkvæm fyrir sliti og áverkum. Algengustu vandamálin sem við tökum á móti eru verkur undir axlarhyrnu (klemma), slit og kalk í vendisinum axlarinnar, frosin öxl, liðhlaup og óstöðugleiki, áverkar á löngu sin tvíhöfðans, slit í axlarhyrnulið og liðhrörnun (slitgigt) í axlarliðnum. Í olnboga meðhöndlum við meðal annars tennisolnboga og laus brot í liðnum.

Flestar aðgerðir eru gerðar með liðspeglun í gegnum lítil op: saumur á vendisinum, losun á klemmu, viðgerð við óstöðugleika, aðgerð á löngu sin tvíhöfða, liðlosun við frosinni öxl og aðgerðir á axlarhyrnu. Við langt gengna slitgigt kemur gerviliður í öxl til greina – hefðbundinn þegar vendisinar eru heilar, viðsnúinn þegar þær eru skemmdar.

Fyrsta skrefið er alltaf viðtal og skoðun, oftast með ómskoðun eða segulómun, þar sem ákveðið er hvort skurðaðgerð sé rétta leiðin eða hvort sterasprauta, sjúkraþjálfun eða önnur meðferð dugi. Mörg axlarvandamál lagast án aðgerðar.