Samningur um greiðsluþátttöku fyrir valdar hryggjaraðgerðir út árið 2024

Það var einstakt gleðiefni að samningur náðist milli Klíníkurinnar og Sjúkratrygginga Íslands um greiðsluþátttöku þeirra í brjósklosaðgerðum annars vegar og brottnámi liðbogaþynnu (fargléttingu) hins vegar út árið 2024. Nú þegar hafa þó nokkrar aðgerðir verið framkvæmdar með góðum árangri.

Samningurinn út árið er liður í því að létta álagi af Landspítalanum og gera einstaklingum, sem ekki hafa komist að í aðgerð á spítalanum, kleift að fá lausn meina sinna annars staðar. Þar af leiðandi eru einstaklingar sem eru á biðlista eftir fyrrgreindum aðgerðum á Landspítalanum í forgangi þegar kemur að greiðsluþátttöku Sjúkratrygginga Íslands í þessum tiltekna samningi, og tilvísun frá Landspítalanum er ein helsta forsenda greiðsluþátttöku Sjúkratrygginga að svo stöddu.

Þessi samningur er fyrsta skrefið í átt að langtímasamningi milli Sjúkratrygginga Íslands og Klíníkurinnar um framtíðarfyrirkomulag og greiðsluþátttöku fyrir þessa nýju heilbrigðisþjónustu á Klíníkinni. Ef langtímasamningar nást, verður hægt að tryggja einstaklingum með bakvandamál tímanleg inngrip og viðeigandi aðgerðir—öllum til heilla.

Hryggjarskurðlækningar á Klíníkinni

Á haustmánuðum hóf Klíníkin að bjóða upp á fjölbreytta heilbrigðisþjónustu við bak- og taugaverkjum. Lagt var upp með að nálgast viðfangsefnið á heildrænan máta með hagsmuni sjúklinga að leiðarljósi. Þannig á einstaklingurinn bæði að fá viðeigandi og tímanlega heilbrigðisþjónustu, sem er sérstaklega mikilvægt þegar kemur að meðferð við bak- og taugaverkjum, þar sem orsökin er oft fjölþætt og þarfnast fjölbreyttrar heilbrigðisþjónustu til að hámarka líkur á bata.

Einvala lið kemur að þessari nýju þjónustu. Hryggjarskurðlæknarnir Kári Gauti Guðlaugsson og Njáll Vikar Smárason hófu störf á Klíníkinni í sumar; þeir hafa fjölbreytta reynslu af hryggjaskurðlækningum frá háskólasjúkrahúsunum í Lundi og Malmö í Svíþjóð. Þá er Bjarki Karlsson, bæklunarskurðlæknir og sérfræðingur í hryggjaskurðlækningum á Sjúkrahúsinu á Akureyri, einnig að hefja störf á Klíníkinni. Í ljósi þess að ýmsar deyfingar og inngripstengdar verkjameðferðir eru stór hluti af þeim meðferðum sem Klíníkin býður upp á, hefur Klíníkin fengið til liðs við sig Bjarna Valtýsson, svæfinga- og verkjalækni sem hefur áratugalanga reynslu af inngripstengdum verkjameðferðum. Þessi hópur lækna mun starfa í teymi sérhæfðs heilbrigðisstarfsfólks Klíníkurinnar, sem hefur víðtæka reynslu af meðhöndlun og umönnun sjúklinga, ásamt því að vera í faglegu samstarfi við Helenu Brisby, prófessor í hryggjarskurðlækningum á Sahlgrenska háskólasjúkrahúsinu í Gautaborg.